Mir sinn neutral!
S ukrainisch Volgg stirbt wägg,
D Schwyzer intressierts e Drägg.
Waffe schigge wär illegal,
Mir sinn scho lang total neutral.
Was wurd denn au de Putin dängge
Wenn mir dä Opfer Panzer schängge?
Doch wenn dr Putin z Oeschtryych stoht
Isch s emänd denn fascht scho z spoot.
Nüt ghööre, nüt gseh, kai Stellig bezieh
Die Ignoranz, die macht uns Mieh.
Autokraate, Diktatoore,
Hänn bi uns doch nüt verloore,
Sett me maine, aber Gäld
Regiert scho immer unseri Wält.
Drägggäld kasch bi uns parkiere,
Will mir d Häärkunft ignoriere
Und uns nid emol scheniere,
Will mir tüchtig abgarniere.
D Goldsuecher hänn in ihre Täsche
Schüssle kha zem s Gold go wäsche.
D Schwyz duet s Gold gärn raffiniere
Und d Häärkunft suuber deklariere.
Mängmol – s goht um s Profitiere-
Au e weeneli kaschiere.
Dräggigs Gold wird suuber gwäsche,
Jo, so fülle mir uns d Täsche.
En arme Ryyche flüchtet in d Schwyz,
Im Ussland het me ohni Witz
Däm Flüchtling scho fascht alles gnoh
Drum isch er wäg, das kunnt drvoo.
Doch mir sinn nid so radikal
Und bestüüre ihn pauschal.
Dr glai Bürger, dasch normal
Zahlt brav e Vilfachs prozentual.
D Staategmainschaft sanktioniert
E Dräggsagg, wo brutal regiert.
D Schwyz macht scho mit, unbedingt,
Wenn me si schlussändlig zwingt.
So Sanktione kasch umschiffe,
Das hänn d Gschäftslüt schnäll begriffe.
Denn isch d Ethik rasch vergässe,
D Schwyzer sinn uff s Gäld versässe.
D Schwyz, das Hochglanzparadies
Isch au zu de Noochber mies.
D EU schiebt me ewig uuse,
Will so Grüppli aim halt gruuse.
D Helvetia stoht und stoht und stoht,
Dr Täll hilft schyynts in höggschter Noot.
Im beschte Fall, wenn mir en liesse
Wurd er zwai, drey Wölf abschiesse.
Nüt ghööre, nüt gseh, kai Stellig bezieh
Die Ignoranz, die macht uns Mieh.
Muet tuet guet, und Muet tuet Not,
Au wenn s bitz an Wohlstand goht.